Bakı 
“Fiziki aktivlik olmadan düzgün qidalanma sümük sağlamlığı üçün kifayət etmir”.
Bakıvaxtı.az xəbər verir ki, bu fikirləri Səhiyyə Nazirliyi Elmi-Tədqiqat Travmatologiya və Ortopediya İnstitutunun travmatoloq-ortopedi İlham Şıxbabayev qurumun “Instagram” səhifəsində keçirilən canlı yayım zamanı deyib.
Mütəxəssis bildirib ki, uşaqların sağlam böyüməsi və sümük sisteminin düzgün inkişafı üçün həm fiziki aktivlik, həm də sağlam və balanslı qidalanma vacibdir.
Onun sözlərinə görə, uşaqların qida rasionunda sümük inkişafı üçün əhəmiyyətli olan mineral maddələrlə zəngin məhsullara üstünlük verilməlidir.
"Xüsusilə kalsium, maqnezium və zülalla zəngin qidaların qəbulu vacibdir. Fiziki aktiv olmayan bir insanın sümüyünə nə qədər düzgün qidalanma versəniz də, bu qidaların sümüyə çatması və onun sağlamlığının təmin olunması baxımından fiziki aktivlik çox önəmlidir”, - deyə İ.Şıxbabayev vurğulayıb.
Travmatoloq qeyd edib ki, müntəzəm fiziki aktivlik sümük sıxlığının artmasına və sümük sisteminin möhkəmlənməsinə kömək edir. Buna görə uşaqlarda sağlam qidalanma ilə yanaşı, yaşa uyğun fiziki fəaliyyət də gündəlik həyatın bir hissəsi olmalıdır.
Zeynəb Rzayeva
