Bakı 
Finlandiya Hərbi Hava Qüvvələri ABŞ-dan sifariş etdiyi ilk F-35A Lightning II qırıcı təyyarələrini qəbul edib.
Bakıvaxtı.az xarici mediaya istinadən xəbər verir ki, ilk təyyarə sentyabrın 18-də Rovaniemidə yerləşən Lapland Wing aviabazasına eniş edib.
Məlumata görə, Finlandiyaya əvvəlcə üç F-35A qırıcısının çatdırılması planlaşdırılıb. Lakin təyyarələrdən biri ABŞ-dan Finlandiyaya transfer zamanı Azor adalarında qalıb.
“Ilta-Sanomat” nəşri üçüncü təyyarənin gecikməsinə texniki nasazlığın səbəb ola biləcəyini yazıb. Bununla belə, bu məlumat rəsmi şəkildə təsdiqlənməyib.
“Iltalehti”nin məlumatına görə, Finlandiya Hərbi Hava Qüvvələri üçün Fort-Uortdakı zavodda istehsal olunan F-35 qırıcıları Texasdan havaya qalxıb.
Qeyd edək ki, Finlandiya 2021-ci ildə “Lockheed Martin” şirkəti ilə 64 ədəd F-35A Lightning II qırıcısının alınması barədə müqavilə imzalayıb. Yeni təyyarələrin ölkənin Hərbi Hava Qüvvələrində istifadə olunan F/A-18 Hornet qırıcılarını əvəz etməsi nəzərdə tutulur.
