Bakı 
Tərəvəz yeməyinə bütöv yumurta əlavə etmək orqanizmin karotenoidləri mənimsəməsini üç-dörd dəfə artıra bilər.
Bakıvaxtı.az xəbər verir ki, bu nəticə 17 qadının iştirakı ilə aparılan araşdırmada əldə olunub və tədqiqatın nəticələri "Food & Function" jurnalında dərc edilib.
Karotenoidlər lütein, zeaksantin və beta-karoten kimi bitki piqmentləridir. Onların bir qismi antioksidant xüsusiyyətlərə malikdir, göz sağlamlığının qorunmasına və immun sisteminin fəaliyyətinə töhfə verə bilər.
Təcrübə iştirakçıları iki mərhələli nəzarətli pəhriz proqramından keçiblər. Birinci mərhələdə onlar əlavə inqrediyent olmadan bişmiş tərəvəz yeməyi, ikinci mərhələdə isə həmin yeməyə 100 qram bütöv yumurta əlavə edilərək hazırlanmış porsiyanı qəbul ediblər.
Tərəvəzlərdə təxminən 27 mq karotenoid, yumurtada isə cəmi 0,5 mq karotenoid olub. Yeməkdən sonra 10 saat ərzində iştirakçılardan qan nümunələri götürülüb və karotenoidlərin mənimsənilməsi qiymətləndirilib.
Nəticədə tərəvəzlərə yumurta əlavə edildikdə karotenoidlərin mənimsənilməsi təxminən üç-dörd dəfə artıb. Alimlər bu təsirin yumurtanın tərkibindəki karotenoidlərlə izah olunmadığını, əsas amillərdən birinin yumurtadakı yağların yağda həll olunan birləşmələrin orqanizm tərəfindən mənimsənilməsinə kömək etməsi ola biləcəyini bildiriblər.
Araşdırmada yumurtanın tərəvəz yeməyindən D2 vitamininin mənimsənilməsinə təsiri də yoxlanılıb. Lakin bu baxımdan etibarlı təsir aşkarlanmayıb.
Tədqiqatın yalnız 17 qadını əhatə etməsi səbəbindən nəticələrin daha geniş araşdırmalarla təsdiqlənməsinə ehtiyac olduğu qeyd edilib.
Murad İsmayıl
