Bakı 
"Bakıda keçirilən “Ortaq gələcək naminə dialoq” mövzusunda keçirilən VII Ümumdünya Mədəniyyətlərarası Dialoq Forumunun açılış mərasimində çıxış edən cənab Prezident İlham Əliyev olduqca önəmli məqamlara diqqət çəkdi. Bu istiqamətdə diqqəti cəlb edən məsələlərdən biri, şübhəsiz ki, Azərbaycanın illər boyu müharibələrin dayandırılması və sülh quruculuğu istiqamətində atdığı fundamental addımlardır".
Bunu siyasi elmlər üzrə fəlsəfə doktoru, politoloq Şəbnəm Həsənova bunu Bakıvaxtı.az-a danışarkən bildirib.
Şəbnəm Həsənova: Beynəlxalq hüququn tətbiqində selektivliyə yol verilməməlidir
Onun sözlərinə görə, bu gün Azərbaycan dünyada nümunəvi model yaratmış bir ölkədir. Eyni zamanda, Azərbaycan öz uğur hekayəsini özü formalaşdırmış bir dövlət və xalqdır:
"Bu istiqamətdə cənab Prezident İlham Əliyev haqlı olaraq hər kəsi bu irsdən öyrənməyə və bəhrələnməyə dəvət etdi. Bu məsələ həm də ona görə xüsusi əhəmiyyət kəsb edir ki, Azərbaycan ikili standartların mövcud olduğu şəraitdə öz reallıqlarını özü yarada bildi. Dövlətimizin və xalqımızın öz gücünə arxalanması bizi bu nəticəyə gətirib çıxardı.
2026-cı il sentyabrın 1-də Qırğızıstanın paytaxtı Bişkekdə Şanxay Əməkdaşlıq Təşkilatının ŞƏT plyus formatında görüşü keçirilərkən cənab Prezident İlham Əliyev həmin tədbirdə də olduqca fundamental xarakterli bir çıxış etmişdi. Xatırlatmaq yerinə düşər ki, BMT-nin Baş katibi Antonio Quterreş də həmin gün ŞƏT sammitində iştirak edirdi. Cənab Prezident İlham Əliyev məhz bu iştirakı və beynəlxalq platformanın əhəmiyyətini nəzərə alaraq Azərbaycanın Ermənistanla sülh prosesinə, beynəlxalq hüququn tətbiqinə, BMT-nin fəaliyyətinə və çoxtərəfli diplomatiyaya dair fundamental baxış ortaya qoydu. Bu istiqamətdə Azərbaycanın mövqeyini ön plana çıxartdı.
Cənab Prezident bildirdi ki, Ermənistanla sülh prosesi yeni regional reallıqlar yaradır. Şübhəsiz ki, sülh sazişinin mətninin paraflanması otuz illik münaqişənin başa çatmasına və Cənubi Qafqazın münaqişə zonasından sülh və əməkdaşlıq zonasına çevrilməsinə zəmin yaradıb".
Politoloq bildirib ki, dövlət başçımız illər ərzində kağız üzərində qalan BMT qətnamələrinə də diqqət çəkmişdi:
"Bu baxımdan, əgər vaxtında müvafiq mexanizmlər yaradılsaydı, düşünürəm ki, yalnız Azərbaycanın problemi həll edilməzdi, həm də dünyada baş verən bir çox haqsızlıqlar öz həllini tapmış olardı. BMT-nin nüfuzu da məhz bu şəraitdə arta bilərdi.
Bu gün Azərbaycan sülhün sadəcə kağız üzərində qalmaması üçün çalışır, praktiki nəticələrə yönələn siyasət ortaya qoyur. Azərbaycan Ermənistana neft məhsulları tədarük edir, üçüncü ölkələrin yüklərinin tranzitini təmin edir. Eyni zamanda, qarşılıqlı ticarətin genişləndirilməsi istiqamətində ciddi iş aparılır. Şübhəsiz ki, sülhü sadəcə bəyanatlarla məhdudlaşdıra bilmərik. İqtisadi və nəqliyyat əlaqələrinin qurulması baxımından da sülh son dərəcə mühüm əhəmiyyət kəsb edir.
Azərbaycan suverenliyini və ərazi bütövlüyünü illər ərzində göstərdiyi səylər hesabına bərpa etdi. BMT-nin münaqişə ilə bağlı qətnamələrinin icrası istiqamətində isə müvafiq addımlar atılmadı. Dövlət başçımız beynəlxalq təşkilatların qəbul etdikləri qərarların real icrası məsələsinə haqlı olaraq tənqidi yanaşma nümayiş etdirdi və bu istiqamətdə mühüm mesaj verdi".
Müsahibimiz qeyd edib ki, Azərbaycan Qoşulmama Hərəkatına dördillik sədrliyi dövründə olduğu kimi, bundan sonra da beynəlxalq münasibətlərdə çoxtərəflilik prinsiplərinin möhkəmləndirilməsinə töhfə verir. Müxtəlif beynəlxalq platformalarda iştirak etməklə milli maraqlarını irəli aparmaq baxımından ardıcıl addımlar atır:
"Beynəlxalq hüququn tətbiqində selektivliyə yol verilməməlidir. Azərbaycan məhz buna çalışır. Eyni zamanda, beynəlxalq təşkilatların qəbul etdiyi qərarların icrası baxımından effektiv mexanizmlər mövcud olmalıdır. Cənab Prezident İlham Əliyevin ŞƏT plyus formatındakı çıxışının əsas mesajlarından biri beynəlxalq hüququn etibarlılığı ilə bağlıdır. Bu etibarlılıq yalnız qəbul edilən qərarlar real icra mərhələsinə çatdıqda və həyata keçirildikdə təmin oluna bilər".
Ş.Həsənovanın sözlərinə görə, bu baxımdan, siyasi razılaşmalarla yanaşı, iqtisadi əməkdaşlıq və nəqliyyat əlaqələrinin inkişafı da bölgəmizdə sülhün möhkəmləndirilməsinə xidmət etməlidir.
Zeynəb Rzayeva
