Bakı 
Çinin Sinhua Universitetinin alimləri hərəkətdə olan minlərlə neyronun fəaliyyətini eyni vaxtda izləməyə imkan verən “Airscope” adlı ultrayüngül simsiz cihaz hazırlayıblar.
Bakıvaxtı.az xəbər verir ki, bu barədə “South China Morning Post” nəşri məlumat yayıb.
Məlumata görə, bu texnologiya beyin funksiyasının mexanizmlərini öyrənməyə kömək edəcək və xərçəng və immun xəstəliklərinin tədqiqatlarında da istifadə edilə biləcək.
“Airscope” mikroskop və makroskop arasında ara mövqe tutan kompakt optik mezoskopdur. Bu cihaz bioloji toxumanın nisbətən böyük bir sahəsindəki fərdi hüceyrələrin fəaliyyətini izləməyə imkan verir.
Təcrübələr zamanı tədqiqatçılar cihazı siçanlara bağlayaraq, onlara gizlənmə yerləri, yuvalar və maneələr daxil olmaqla xüsusi təchiz olunmuş mühitdə sərbəst hərəkət etməyə imkan veriblər. Alimlər “Airscope”dan istifadə edərək heyvanın beyin qabığındakı 8500-dən çox fərdi neyronun fəaliyyətini eyni vaxtda qeydə ala biliblər.
Əldə edilən məlumatlar onlara neyron şəbəkələrinin fəaliyyəti ilə siçanların sosial davranışı arasındakı əlaqəni öyrənməyə imkan verdi. Gələcəkdə depressiya kimi problemlərin öyrənilməsinə kömək edə biləcək emosiyalar və sosial qarşılıqlı təsirlərlə əlaqəli neyron mexanizmlərini araşdırmağı planlaşdırır.
Müəlliflərə görə, texnologiyanın potensial tətbiqləri yalnız neyrobiologiya ilə məhdudlaşmır. Gələcəkdə oxşar görüntüləmə sistemləri immunologiya və onkologiyada xəstəliklərin inkişafını izləmək üçün də istifadə edilə bilər.
