Bakı 
2026-cı ilin doqquz ayının yekunlarına görə, Ermənistanın Avropa ölkələrinə ixrac etdiyi malların ümumi dəyəri 2025-ci ilin eyni dövrü ilə müqayisədə 1,5 dəfə artıb.
Bakıvaxtı.az xəbər verir ki, ölkənin iqtisadiyyat naziri Gevork Papoyan ixrac tədarüklərinin kəskin artdığını bildirib.
Nazir qeyd edib ki, hesabat dövründə Ermənistan ixracatçıları Avropa İttifaqına (Aİ) ümumilikdə 717 milyon dollar dəyərində mal göndəriblər. Ötən ilin yanvar-sentyabr aylarında bu göstərici 475 milyon dollar təşkil edib. Beləliklə, Avropa istiqamətində ixracın dəyəri 242 milyon dollar artıb.
Ermənistanın Aİ ilə ticarətindəki kəskin artım Rusiya ilə iqtisadi münasibətlərin soyuması fonunda baş verir. Ermənistan Baş naziri Nikol Paşinyan dəfələrlə Avropaya inteqrasiyaya üstünlük vermək niyyətində olduğunu bəyan edib. Öz növbəsində, Aİ bu mövqeyi dəstəkləyərək, Rusiyadan ticarət asılılığının azaldılması məqsədilə Ermənistana maliyyə yardımı göstərməyə söz veriblər.
Rusiya bu fonda Ermənistanın bir sıra məhsul növlərinin idxalına məhdudiyyətlər tətbiq edib. Paşinyan buna cavab olaraq ixracın şaxələndirilməsi siyasətinə sadiq qalacağını bildirib. Ermənistan Baş naziri vurğulayıb ki, Rusiyaya ərzaq tədarükü ilə bağlı problemlər aradan qaldırılsa belə, ölkə təchizatçıları yeni perspektivli satış bazarları axtarmağa davam edəcəklər.
