32 bit və 64 bit - VACİB SEÇİM

Texnologiya ilə bağlı ən çox qarşılaşdığımız anlayışlardan biri “32 bit” və “64 bit” terminləridir. Bu fərq cihazın performansına, sürətinə və yaddaş imkanlarına birbaşa təsir göstərir.

Bakıvaxtı.az-ın məlumatına görə, 32 bit və 64 bit anlayışları kompüterin prosessorunun məlumatı necə emal etdiyini göstərir. Əsas fərq cihazın yaddaşdan istifadə imkanında və performansında özünü göstərir.

32 bit sistemlər maksimum təxminən 4 GB RAM yaddaşı dəstəkləyir. Bu səbəbdən köhnə kompüterlərdə və zəif texniki göstəricilərə malik cihazlarda daha çox istifadə olunurdu.

64 bit sistemlər isə daha çox yaddaşdan istifadə edə bilir və məlumatları daha sürətli emal edir. Müasir kompüter və telefonların böyük hissəsi artıq 64 bit arxitektura ilə işləyir.

Texnologiya şirkəti Microsoft bildirir ki, 64 bit əməliyyat sistemləri xüsusilə oyun, video montajı və ağır proqramlarda daha yüksək performans təqdim edir.

Apple da son illərdə tətbiqlər və cihazlarda əsasən 64 bit dəstəyinə keçib. Şirkət bunun daha sürətli işləmə və təhlükəsizlik baxımından üstünlük yaratdığını qeyd edir.

Mütəxəssislərə görə, 32 bit proqramlar bəzi köhnə sistemlərdə işləsə də, yeni proqram və tətbiqlərin əksəriyyəti artıq 64 bit üçün optimallaşdırılır.

İstifadəçilər kompüterlərinin neçə bit olduğunu “System Information” və ya “About” bölməsindən öyrənə bilər.

Zeynəb Rzayeva