Bakı 
Rusiyanın Rostov vilayətindəki neft emalı zavodu dron hücumundan sonra fəaliyyətini dayandırıb.
Bakıvaxtı.az xəbər verir ki, bu barədə Rostov qubernatoru Yuri Slyusar yazılı açıqlamada məlumat verib.
Slyusar hava hücumunun dəf edilməsi zamanı altı rayonda təxminən 50 dron zərərsizləşdirildiyini və Novoşaxtinsk Neft Emalı Zavodunun zədələndiyini və fəaliyyətini müvəqqəti olaraq dayandırdığını bildirib.
Qubernator əlavə edib ki, hücumdan sonra bölgədə xəsarət alanlar və ya ziyanla bağlı əlavə məlumat alınmayıb. Araşdırmalar davam edir.
Perm qubernatoru Dmitri Mahonin də bildirib ki, səhər saatlarından bəri bölgəyə intensiv dron hücumları davam edir.
Mahonin hava hücumundan müdafiə sistemlərinin dronları ələ keçirdiyini və hücumlarda bölgədəki sənaye müəssisəsinin hədəf alındığını bildirib.
İlkin məlumatlara görə, xəsarət alan olmayıb və təcili və əməliyyat qrupları müəssisədə işlərini davam etdirir.
Emal gücünə görə Rusiyanın yeddinci ən böyük neft emalı zavodu olan Permnefteorgsintez ildə 13 milyon tona qədər xam neft emal etmək gücünə malikdir.
Murad Məmmədli
