Bakı 
Çinli alimlər müəyyən ediblər ki, fruktooliqosaxaridlər ilə çaytikanının birgə istifadəsi qanda şəkərin səviyyəsini azalda və yağ mübadiləsinin göstəricilərini yaxşılaşdıra bilər.
Bakıvaxtı.az xəbər verir ki, tədqiqatın nəticələri “Food & Function (F&F)” jurnalında dərc olunub.
Araşdırma ikinci tip şəkərli diabeti olan siçovullar üzərində aparılıb. Bu xəstəlik zamanı orqanizm insulin hormonundan səmərəli istifadə etmir. Nəticədə qanda qlükozanın səviyyəsi yüksəlir, sonradan isə orqan və toxumalarda zədələnmələr yaranır.
Acqarına əlavə qəbulundan sonra heyvanlarda şəkərin səviyyəsi azalıb. Qanda triqliseridlərin və ürək-damar xəstəlikləri riski ilə bağlı olan “pis” xolesterinin (aşağı sıxlıqlı lipoproteinlərin) konsentrasiyası da aşağı düşüb.
Alimlərin sözlərinə görə, fruktooliqosaxaridlər prebiotiklərdir, yəni mədədə həzm olunmayan, lakin bağırsaqdakı faydalı bakteriyalar üçün “qida” rolunu oynayan maddələrdir. Çaytikanı isə vitaminlər, antioksidantlar və yağ turşuları kimi bioloji aktiv birləşmələrlə zəngindir.
“Təsir eyni anda bir neçə mexanizmlə bağlıdır. Birincisi, bağırsaq mikrobiotasının, yəni bağırsaqda yaşayan mikroorqanizmlərin ümumi tərkibi dəyişib. Maddələr mübadiləsinin normal gedişi ilə bağlı olan “Bifidobacterium” və “Akkermansia” kimi faydalı bakteriyaların sayı artıb, iltihabı gücləndirən bakteriyaların sayı isə azalıb”, – deyə tədqiqatçılar bildiriblər.
Əlavə həmçinin qaraciyərdə yaranan və yalnız yağların həzmində deyil, həm də qanda şəkər və lipidlərin səviyyəsinin tənzimlənməsində iştirak edən öd turşularının mübadiləsini normallaşdırıb. Bundan başqa, heyvanlarda metabolik pozuntuları tez-tez müşayiət edən və diabetin gedişatını ağırlaşdıran iltihab əlamətləri zəifləyib.
Müəlliflər vurğulayırlar ki, hələlik söhbət heyvanlar üzərində aparılmış təcrübədən gedir. Bununla belə, əldə olunan nəticələr prebiyotiklərlə bitki tərkibli komponentlərin birləşməsinin diabetin profilaktikası və əlavə korreksiyası üçün perspektivli istiqamət olduğunu göstərir./Azərtac
