Bakı 
Ukraynada yerləşən və xalq arasında "Çin Səddi" kimi tanınan bu bina 2,75 kilometrlik uzunluğu ilə sərhədləri aşır. İçərisində 3 mindən çox mənzil olan binada yeni köçənlər öz evlərini tapmaq üçün günlərlə vaxt sərf edirlər.
Bakıvaxtı.az xəbər verir ki, Ukraynanın qərbində yerləşən və dünyanın ən uzun yaşayış binası sayılan bu nəhəng tikili bu gün müharibənin kölgəsində zamana qarşı müqavimət göstərir. Sobornosti Bulvarı ilə Molodeji küçəsinin kəsişməsində yerləşən bu nəhəng kompleks ciddi təmir və bərpa ehtiyacı ilə üz-üzədir.
Memarlar R. Q. Metelnitski və V. K. Malovitsa tərəfindən layihələndirilən binanın inşasına 1969-cu ildə, Sovet İttifaqı dövründə başlanılıb. Tikintisi 11 il çəkən və 1980-ci ildə tamamlanan bina o vaxtdan bəri dünyanın ən uzun yaşayış binası titulunu qoruyur.
Əsas oxu 1,75 km olsa da, bitişik əlavələrlə birlikdə ümumi uzunluğu 2,75 kilometrə çatır.
Binada 3000-dən çox mənzil və yüzlərlə giriş (blok) var.
Təxminən 10.000 insanın yaşadığı bu bina bir çox kiçik qəsəbənin əhalisindən daha çox sakini bir araya gətirir.
Binanın nəhəng ölçüləri və "bal pətəyi" şəklindəki mürəkkəb dizaynı səbəbindən bura ilk dəfə köçən sakinlərin öz mənzillərini tapmaqda çətinlik çəkdiyi bildirilir. Bu problemi həll etmək üçün binanın hər hissəsi üçün xüsusi və unikal ünvan sistemi tətbiq olunub. Normal yeriş sürəti ilə binanın bir ucundan digər ucuna getmək təxminən bir saat vaxt aparır.
Ukraynadakı müharibənin cəbhə xəttindən uzaqda yerləşməsinə baxmayaraq, ölkədəki təhlükəsizlik riskləri və iqtisadi məhdudiyyətlər binanın baxım işlərinə mənfi təsir göstərir. Yerli media binanın fiziki vəziyyətinin yaxşılaşdırılması üçün təcili maliyyə vəsaitinə ehtiyac olduğunu vurğulayır./Milli.az
