Fransa iqtisadiyyatında durğunluq: artım zəifləyir, inflyasiya yüksəlir

Məşhur “Le Monde” qəzetində “Fransa iqtisadiyyatında durğunluq: artım zəifləyir, inflyasiya yüksəlir” başlıqlı məqalə dərc olunub.

Bakıvaxtı.az-ın məlumatına görə, materialda qeyd edilir ki, Fransada 2026-cı ilin ilk rübündə iqtisadi artım gözləntiləri özünü doğrultmayıb. Fransanın Milli Statistika və İqtisadi Araşdırmalar İnstitutu (INSEE) tərəfindən açıqlanan ilkin göstəricilərə əsasən, ölkə iqtisadiyyatı üzrə artım tempi 0% səviyyəsində qalıb. Halbuki iqtisadçılar bu dövr üçün 0,2%–0,3% aralığında artım proqnozlaşdırırdılar.

Bu nəticə əvvəlki rüblə müqayisədə geriləmə kimi qiymətləndirilir. Belə ki, 2025-ci ilin son rübündə Fransa iqtisadiyyatında 0,2% artım qeydə alınmışdı. Lakin yeni ilin əvvəlində bu dinamika dayanıb və iqtisadi fəallıq faktiki olaraq sabitləşib.

Mövcud vəziyyət hökumətin illik proqnozlarını da sual altına alır. Rəsmi hədəfə əsasən, 2026-cı il üçün iqtisadi artım 0,9% səviyyəsində nəzərdə tutulsa da, ekspertlər bu göstəricini artıq “optimist” hesab edirlər. Hesablamalara görə, bu hədəfə çatmaq üçün ilin qalan üç rübündə ÜDM hər rübdə təxminən 0,3% artmalıdır. Lakin hazırkı dinamika fonunda bu tempin qorunması çətin görünür.

İlin əvvəlində formalaşan ümumi artım “ehtiyatı” isə cəmi 0,5% təşkil edir ki, bu da növbəti dövr üçün zəif iqtisadi impuls deməkdir.

Ekspertlər əlavə edirlər ki, qlobal iqtisadi risklər vəziyyəti daha da ağırlaşdıra bilər. Xüsusilə enerji daşımalarının əsas marşrutlarından biri olan Hörmüz boğazı ətrafında mümkün gərginliklər Fransa iqtisadiyyatının illik artımına mənfi təsir göstərə bilər.

Ümumilikdə, iqtisadi artımın dayanması və inflyasiya təzyiqlərinin davam etməsi Fransada 2026-cı il üçün mürəkkəb iqtisadi mənzərənin formalaşdığını göstərir.

Aydın