Bakı 
Milli Məclisin sədri Sahibə Qafarova ABŞ-də işgüzar səfərdədir. Bu səfər Bakı-Vaşinqton münasibətlərində parlament diplomatiyasının fəallaşması baxımından diqqət çəkir.
İki ölkə arasında əlaqələr uzun müddət əsasən prezident administrasiyaları və xarici siyasət qurumları xətti ilə inkişaf edib. Parlamentlərarası təmasların genişlənməsi isə siyasi dialoqa əlavə dayanıqlılıq qazandıra, münasibətlərin daha geniş institusional bazaya söykənməsinə imkan yarada bilər. Bu mənada səfər yalnız protokol xarakterli hadisə deyil, ikitərəfli əlaqələrin yeni kanallar vasitəsilə möhkəmləndirilməsi cəhdidir.
ABŞ Konqresinin xarici siyasətə, maliyyə qərarlarına və ayrı-ayrı ölkələrlə münasibətlərin hüquqi çərçivəsinə təsiri nəzərə alındıqda, bu istiqamətdə birbaşa dialoq Azərbaycan üçün xüsusi əhəmiyyət daşıyır. Vaşinqtonda Azərbaycanla bağlı müzakirələr zaman-zaman birtərəfli məlumatların və müxtəlif lobbi qruplarının təsiri altında formalaşıb. Parlament rəhbərliyi səviyyəsində əlaqələrin inkişafı Azərbaycanın mövqeyinin vasitəçilərsiz çatdırılmasına, ölkəmiz haqqında daha obyektiv siyasi təsəvvürün yaranmasına kömək edə bilər. Bununla yanaşı, davamlı təmaslar Konqresdə Azərbaycanla əməkdaşlığa maraq göstərən siyasi dairələrin genişlənməsinə şərait yaradar.
Səfərin regional proseslər baxımından da mühüm mesajları var. Azərbaycan Cənubi Qafqazda sülh gündəliyi, yeni nəqliyyat xətlərinin açılması, Orta Dəhlizin inkişafı və Avropanın enerji təhlükəsizliyinə töhfəsi ilə ABŞ üçün əhəmiyyətli tərəfdaş mövqeyini gücləndirir. Bakı bu dialoq vasitəsilə regiona yalnız keçmiş münaqişə prizmasından deyil, iqtisadi inteqrasiya və strateji bağlantılar məkanı kimi yanaşılmasını təşviq edə bilər. Bu isə ABŞ-nin Cənubi Qafqaz siyasətində Azərbaycanın rolunun daha real və balanslı qiymətləndirilməsinə imkan verər.
Səfərin konkret nəticələri keçiriləcək görüşlərin məzmunundan və sonrakı mərhələdə əldə olunan razılaşmaların davam etdirilməsindən asılı olacaq. Parlament komitələri, dostluq qrupları və qanunvericilər arasında müntəzəm əlaqələr qurularsa, bu proses siyasi münasibətlərlə yanaşı iqtisadi, təhlükəsizlik və humanitar əməkdaşlığa da təsir göstərə bilər. Əsas məqsəd dialoqu ayrı-ayrı səfərlərlə məhdudlaşdırmadan davamlı mexanizmə çevirmək olmalıdır. Belə bir yanaşma Azərbaycan–ABŞ münasibətlərini daxili siyasi dəyişikliklərə və müvəqqəti fikir ayrılıqlarına qarşı daha dayanıqlı edə bilər.
Züriyə Qarayeva
