Bakı 
World Urban Forum 13 başa çatdı. Amma tədbirin yaratdığı siyasi və ictimai təsir hələ də davam edir.
Bakı bir neçə gün ərzində dünyanın müxtəlif ölkələrindən gələn nümayəndələri, beynəlxalq təşkilatları, şəhərsalma mütəxəssislərini və qərarverici şəxsləri qəbul etdi. Bu mənzərə Azərbaycanın beynəlxalq tədbirləri təşkil etmək təcrübəsinin artıq təsadüfi uğur olmadığını, ardıcıl siyasətin nəticəsinə çevrildiyini göstərdi.
Forumun ən vacib tərəflərindən biri Azərbaycanın öz inkişaf gündəliyini beynəlxalq gündəmlə uzlaşdıra bilməsi idi. Şəhərsalma, dayanıqlı inkişaf, iqlimə uyğun şəhər modeli, sosial infrastruktur və yaşayış mühitinin keyfiyyəti kimi məsələlər bu gün bütün dünyada əsas müzakirə mövzularındandır. Azərbaycan bu müzakirənin içində yalnız ev sahibi kimi yox, öz təcrübəsini təqdim edən ölkə kimi görünməyə çalışdı.
Xüsusilə işğaldan azad edilmiş ərazilərlə bağlı təqdim olunan yanaşma forumun diqqət çəkən istiqamətlərindən oldu. Qarabağ və Şərqi Zəngəzurda aparılan bərpa prosesi yalnız tikinti layihələri kimi təqdim edilmir. Burada təhlükəsiz yaşayış, müasir infrastruktur, ağıllı kənd və ağıllı şəhər konsepsiyaları, ekoloji yanaşma və geri qayıdacaq insanların həyat şəraiti bir-biri ilə bağlı şəkildə düşünülür. Bu baxımdan WUF13 Azərbaycanın postmünaqişə dövründə həyata keçirdiyi quruculuq siyasətini beynəlxalq auditoriyaya göstərmək üçün əlverişli imkan yaratdı.
Bakı üçün belə tədbirlərin başqa bir əhəmiyyəti də var. Ölkəyə gələn xarici nümayəndə yalnız rəsmi iclas zalını görmür. O, şəhərin təhlükəsizliyini, nəqliyyatın təşkilini, qonaqlama imkanlarını, ümumi idarəetmə mədəniyyətini və ictimai mühiti də müşahidə edir. Bu mənada WUF13 Azərbaycanın beynəlxalq imicinə sakit, amma təsirli töhfə verdi.
Forumun başa çatması mövzunun aktuallığını azaltmır. Əksinə, indi daha vacib mərhələ başlayır: burada səslənən fikirlərin, qurulan əlaqələrin və aparılan müzakirələrin gələcək əməkdaşlıq formatlarına çevrilməsi. Azərbaycan üçün əsas qazanc da məhz budur. Bakı bir daha göstərdi ki, qlobal məsələlər ətrafında tərəfləri eyni masa ətrafında toplamaq, dinləmək və dialoq mühiti yaratmaq imkanına malikdir.
WUF13 həm də ölkə daxilində şəhərsalma mövzusuna diqqəti artırdı. Böyük forumlar yalnız xarici qonaqlar üçün keçirilmir. Onlar yerli ictimaiyyətə də bir mesaj verir: şəhər mühiti, ictimai nəqliyyat, yaşıllıq sahələri, inklüziv infrastruktur və rahat yaşayış artıq gündəlik həyatın əsas keyfiyyət göstəriciləridir. Bu baxımdan forumdan sonra şəhərsalma məsələlərinin daha ciddi ictimai müzakirəyə çevrilməsi təbii görünür.
Nəticə olaraq, WUF13 Azərbaycanın beynəlxalq təşkilatçılıq təcrübəsinə yeni səhifə əlavə etdi. Bakı bu tədbirdən yalnız ev sahibi şəhər kimi yox, müzakirə aparan, gündəm təqdim edən və öz inkişaf modelini göstərən paytaxt kimi çıxdı. İndi əsas məsələ bu diqqəti davamlı əməkdaşlığa və real layihələrə çevirməkdir.
Züriyə Qarayeva
