Bakı 
Tahir Budaqovun Nəsimi Rayon İcra Hakimiyyətinin başçısı təyin edilməsindən sonra onun Yeni Azərbaycan Partiyasındakı vəzifəsinin taleyi də diqqət çəkən məsələlərdən birinə çevrilib.
Bakıvaxtı.az məsələni hüquqi və təşkilati baxımdan araşdırıb.
İlk növbədə qeyd edək ki, Tahir Budaqovun icra başçısı təyin olunması onun YAP Mərkəzi Aparatının rəhbəri vəzifəsindən avtomatik getməsi demək deyil.
Mövcud hüquqi çərçivədə rayon icra hakimiyyəti başçısının YAP üzvü olması və ya partiyada konkret vəzifə tutması ilə bağlı avtomatik xitam mexanizmi nəzərdə tutulmayıb.
Xatırladaq ki, Tahir Budaqov 9 fevral 2026-cı ildə Prezident İlham Əliyevin sərəncamı ilə Nəsimi Rayon İcra Hakimiyyətinin başçısı təyin olunub. Eyni zamanda YAP-ın rəsmi məlumatlarında o, partiya sədrinin müavini – Mərkəzi Aparatın rəhbəri kimi göstərilir.
Burada əsas məsələ iki vəzifənin hüquqi mahiyyətinin fərqli olmasıdır.
İcra hakimiyyəti başçısı dövlət vəzifəsidir və onun təyinatı Prezidentin səlahiyyətinə daxildir.
Mərkəzi Aparat rəhbəri isə partiyadaxili vəzifədir və YAP-ın Nizamnaməsi ilə tənzimlənir.
YAP Nizamnaməsində icra hakimiyyəti başçısı təyin edilən şəxsin avtomatik olaraq Mərkəzi Aparat rəhbəri vəzifəsindən çıxmasını tələb edən konkret norma yoxdur.
Bu isə o deməkdir ki, Budaqovun icra başçısı təyin olunması onun YAP-dakı vəzifəsinə avtomatik xitam vermir.
Bəs Mərkəzi Aparat rəhbəri postundan ayrıla bilərmi?
Əlbəttə. Bu, hüquqi baxımdan mümkündür. Lakin belə dəyişiklik avtomatik deyil, ayrıca partiyadaxili qərarla həyata keçirilməlidir.
Başqa sözlə, Tahir Budaqov YAP üzvlüyünü də saxlaya bilər, partiyanın rəhbər strukturlarında başqa statusda da fəaliyyət göstərə bilər. Eyni zamanda Mərkəzi Aparat rəhbəri vəzifəsindən azad edilə bilər.
Burada hakim partiyanın VIII qurultay məsələsi də xüsusi maraq doğurur.
Qurultay partiyanın ali orqanıdır və təşkilatın rəhbər strukturlarının formalaşdırılması baxımından mühüm mərhələdir. Buna görə də qurultay ərəfəsində partiyanın rəhbərliyində və strukturunda dəyişikliklərin müzakirə olunması təbii siyasi prosesdir.
Lakin hazırda “Tahir Budaqov VIII qurultayda mütləq Mərkəzi Aparat rəhbəri vəzifəsindən çıxarılacaq” deməyə əsas verən rəsmi qərar yoxdur.
Eyni zamanda onun bu postda qalmasının qanunla qadağan edildiyini söyləmək də doğru olmaz.
Burada daha çox siyasi və təşkilati seçim məsələsi ortaya çıxır.
Budaqovun qarşısında faktiki olaraq iki status var: bir tərəfdən dövlət idarəçiliyində Nəsimi Rayon İcra Hakimiyyətinin başçısı, digər tərəfdən isə YAP rəhbərliyində yüksək vəzifə.
Bu iki statusun gələcəkdə necə uzlaşdırılacağı isə hüquqi məcburiyyətdən daha çox partiyanın qərarından asılıdır.
Əli Hüseynov
