Bakı 
Bordoya çatan "Ambition" kruiz laynerində təxminən 1 700 sərnişin karantinə alınıb. Buna səbəb göyərtədəki bir kişinin norovirusdan qaynaqlanan qastroenteritdən ölməsi olub.
Bakıvaxtı.az-ın xəbərinə görə, bu barədə "Sud Ouest" qəzeti məlumat dərc edib.
Nəşrin məlumatına görə, ölən şəxs yaşı 90-dan yuxarı olan Britaniya vətəndaşı olub. Daha 50 sərnişin və ekipaj üzvü xəstələndiyi üçün gəmidə olan bütün insanlar təcrid ediliblər.
Gəmi Şetland adalarından Fransanın cənub-qərbinə gəlib, Belfast, Liverpul və Brestdə (Fransa) fasilələr edib.
Sərnişinlərdən analizlər üçün biomaterialların toplanması məqsədilə gəmiyə həkimlərdən ibarət qrup göndərilib. Prefekturanın əmri ilə sərnişinlərə və ekipaj üzvlərinə nəticələr əldə edilənə qədər gəmini tərk etmək qadağan olunub.
Qəzetin qeyd etdiyi kimi, bu hadisədə hantavirusla hər hansı əlaqə yoxdur. Söhbət qastroenterit epidemiyasından gedə bilər ki, onun yayılmasına da gəmidəki qapalı məkan səbəb ola bilər.
