Cache yaddaş nədir? 

Müasir texnoloji cihazlarda, istər kompüter, istər telefon, istərsə də planşet olsun, əməliyyatların sürətli icrasını təmin edən ən mühüm komponentlərdən biri keş yaddaşdır. 

Bakıvaxtı.az Türkiyənin "natro.com" saytına istinadən xəbər verir ki, prosessorun (CPU) iş sürəti inanılmaz dərəcədə yüksəkdir və o, daim yaddaşdan məlumat oxumağa ehtiyac duyur. Lakin əsas sistem yaddaşı (RAM) çox vaxt prosessorun bu yüksək sürətinə çatdıra bilmir, nəticədə prosessor məlumatı gözləməli olur və sistem yavaşlayır. Məhz bu "dar boğaz"ı aradan qaldırmaq üçün prosessorun daxilində yüksək sürətli keş yaddaşlar yerləşdirilir.

Keş yaddaşın iş prinsipi və faydaları

Keş yaddaş, proqramların işləməsi üçün lazım olan əmr və məlumatları müvəqqəti saxlayan bir körpü rolunu oynayır. Tez-tez istifadə olunan məlumatların kopyasını özündə saxlayaraq, hər dəfə ana yaddaşa (RAM) müraciət etmə ehtiyacını aradan qaldırır. Məlumatlar prosessora fiziki olaraq daha yaxın və daha sürətli bir yaddaşda saxlanıldığı üçün proqramlar daha qısa müddətdə açılır və əməliyyatlar ləngimədən icra edilir. 

Keş yaddaşın təmizlənməsi

Keş yaddaş ana yaddaş qədər böyük deyil, lakin ondan dəfələrlə sürətlidir. Onun əsas məqsədi ən son istifadə edilmiş məlumatları prosessora yaxın tutaraq vaxt itkisini minimuma endirməkdir. Keş yaddaş birbaşa istifadəçi tərəfindən idarə olunmur və məlumatlar bura avtomatik qeyd edilir. İstifadəçilər keş yaddaşı təmizlədikdə cihazda müvəqqəti bir yavaşlama hiss edə bilərlər. Çünki keş boşaldıqda, prosessor əvvəllər hazır tapdığı məlumatları yenidən daha yavaş olan ana yaddaşdan toplamağa məcbur olur.

Aydın