Bakı 
Vyaçeslav Volodin yeni çağırışda da Dövlət Dumasının spikeri vəzifəsində fəaliyyətini davam etdirəcək.
Bakıvaxtı.az xəbər verir ki, bu barədə RBK-ya iki federal məmur və Prezident Administrasiyasına yaxın olan məlumatlı mənbə bildirib.
Nəşrin Dövlət Dumasındakı mənbəsinin məlumatına əsasən, Volodinin öz vəzifəsində qalması ilə bağlı qərar artıq təsdiqlənib. Bununla belə, mənbə qeyd edir ki, bu cür qərarları yekun olaraq yalnız dövlət başçısı qəbul edir. Dumadakı iki mənbə vurğulayır ki, bu səviyyəli qərarlar hətta ilk plenar iclas ərəfəsində belə dəyişdirilə bilər.
Mənbələrin sözlərinə görə, Dumanın spikeri Rusiya parlamenti aşağı palatasının yeni tərkibinin müzakirələrində fəal iştirak edib. Onlar bildirirlər ki, yeni Dumaya məhz Volodin rəhbərlik edəcəyi üçün onun rəyinin nəzərə alınması zəruridir.
Qeyd edək ki, Dumanın spikerinin səlahiyyət müddəti uzadılarsa, bu, bir rekord olacaq, çünki əvvəllər heç bir siyasətçi ardıcıl olaraq iki dəfədən artıq bu vəzifəni tutmayıb.
Spiker Dövlət Duması tərəfindən deputatlar arasından seçilir. 2026-cı il seçkisində Volodin öz doğma Saratov vilayəti üzrə ərazi qrupuna rəhbərlik edib, həmçinin 164 nömrəli Saratov birmandatlı seçki dairəsindən partiya tərəfindən namizədliyini irəli sürərək 82.84% səs toplayıb və qalib gəlib.
Volodin ilk dəfə 1999-cu ildə "Vətən - Vahid Rusiya" blokundan Dövlət Dumasına seçilib. 2001-ci ildə o, həmin fraksiyanın rəhbəri olub. 2003-cü ildə yenidən Dumaya seçilərək vitse-spiker, Vahid Rusiya fraksiyası rəhbərinin birinci müavini postunu tutub.
2010-cu ildə Volodin o vaxt Vladimir Putinin rəhbərlik etdiyi hökumətin aparat rəhbəri - baş nazirin müavini vəzifəsinə təyin edilib. 2011-ci ildə Prezident Administrasiyası rəhbərinin daxili siyasətə cavabdeh olan birinci müavini olub. Bu vəzifədə o, 2012-ci il prezident seçkisinə və 2016-cı il Dövlət Duması seçkisinə rəhbərlik edib. Sonuncu seçkidə Vahid Rusiya partiyası - dörd illik fasilədən sonra - konstitusiya çoxluğunu əldə edib və sonrakı bütün seçkilərdə bu statusu qoruyub saxlayıb. Volodin kampaniyada ərazi qruplarından birinin lideri kimi iştirak edib və bu müddət ərzində Prezident Administrasiyasında məzuniyyətə çıxıb. Seçkidən sonra o, Dumanın spikeri seçilib və son on ildir ki, bu vəzifəni icra edir.
