Bakı 
Siqaret çəkən qadınlarda sonsuzluq riski siqaret çəkməyənlərlə müqayisədə 40 faiz daha yüksəkdir.
Bakıvaxtı.az xəbər verir ki, bu barədə Ümumdünya Səhiyyə Təşkilatının (ÜST) elmi araşdırmaların nəticələrinə əsaslanan icmalında bildirilib.
Məlumata görə, siqaret çəkmək kişilərdə də reproduktiv sağlamlığa mənfi təsir göstərir. Siqaret çəkən kişilərdə spermanın keyfiyyəti və hərəkətliliyi azalır, spermatozoidlərin formasında dəyişikliklər yarana bilər. Həmçinin ereksiya və boşalma problemlərinin yaranma riski artır.
ÜST qeyd edir ki, siqareti tərgitmək sonsuzluq riskini azalda bilər. Əvvəllər siqaret çəkib sonradan tərgidən qadınlarda sonsuzluq riski siqaret çəkməyə davam edənlərlə müqayisədə 25 faiz daha aşağıdır.
Siqaretin mənfi təsiri sonsuzluğun müalicəsində də özünü göstərir. 21 araşdırmanın nəticələrinə əsasən, siqaret çəkən şəxslərdə süni mayalanma (IVF) kimi reproduktiv müalicələrdən sonra hamiləlik və diri doğuş ehtimalı daha aşağıdır.
İkinci əl tütün tüstüsünün də reproduktiv sağlamlığa mənfi təsir göstərə biləcəyi bildirilir. Müntəzəm olaraq tütün tüstüsünə məruz qalmaq qadınlarda sonsuzluq riskini artıra və hər ay hamilə qalmaq ehtimalını azalda bilər.
Murad İsmayıl
