Bakı 
BMT-nin Baş katibi Antonio Quterreş cümə axşamı bildirib ki, beynəlxalq qurumun əməliyyatlarını yenidən qurmaq üçün davam edən səylər üzv dövlətlərin maliyyə öhdəliklərini yerinə yetirməsini tələb edir.
Bakıvaxtı.az BMT-nin məlumatına istinadla xəbər verir ki, Baş Assambleyanın panelində brifinq verən Quterreş ölkələrin üzvlük haqlarını tam və vaxtında ödəmələrinin “əsas məsuliyyət” olduğunu söyləyərək, onları “şərtlər və ya gecikmələr olmadan” bu qaydaya əməl etməyə çağırıb. O əlavə edib: “UN80 paktı Birləşmiş Millətlər Təşkilatının fəaliyyətini yaxşılaşdıra bilər, lakin bu əsas müqavilə öhdəliyinin yerinə yetirilməməsini əvəzləyə və ya kompensasiya edə bilməz”, - deyə Quterreş BMT-nin əməliyyatlarını yenidən qurmaq üçün davam edən səylərinə toxunaraq bildirib.
Bu şərhlər, əsasən, ABŞ Prezidenti Donald Trampın Vaşinqtonun töhfələrini ciddi şəkildə məhdudlaşdırmaq qərarı səbəbindən BMT-nin maliyyə böhranı ilə üzləşdiyi bir vaxta təsadüf edir. Mayın 7-də dərc edilən BMT hesabatında deyilir ki, üzv dövlətlər bütün üzvlük haqlarını ödəməsələr, beynəlxalq qurum avqustun ortalarına qədər ağır maliyyə böhranı ilə üzləşəcək.
Ümumilikdə, BMT-nin ödənilməmiş müntəzəm büdcə kəsiri 2,798 milyard dollardır. Çin təxminən 429 milyon dollar ödənilməmiş borcla ABŞ-dən sonra ikinci yerdədir.
Quterreş bildirib: “Bu an düşünülmüş və qətiyyətli islahatlar tələb edir, çünki geosiyasi qarışıqlıq qarşısında hərəkətsizlik insanların əzablarını daha da artıracaq. Üzv dövlətlər daha güclü və təsirli BMT sistemi formalaşdırmaq istəklərini ifadə edir. Buna görə də UN80 çərçivəsində təklif olunan islahatlar qlobal problemlərin həllində daha çevik, ardıcıl, səmərəli və təsirli olan bir sistem üçün aparılır”.
