Bakı 
Yeni tədris ilinin başlamasına artıq sayılı günlər qalıb. Minlərlə valideyn övladının hansı məktəbdə təhsil alacağı ilə bağlı seçim edir.
Dövlət məktəbləri ilə yanaşı, son illər Azərbaycanda özəl məktəblərə maraq da artır. Lakin özəl məktəb seçərkən valideynləri düşündürən əsas məsələlərdən biri təhsil haqqıdır.
Bakıvaxtı.az Azərbaycanda illik təhsil haqqı ən yüksək olan özəl məktəbləri müəyyənləşdirib.
Məlum olub ki, bəzi məktəblərdə bir şagirdin yalnız illik təhsil haqqı 20-25 min manat civarındadır. Beynəlxalq proqramlarla fəaliyyət göstərən bəzi məktəblərdə isə bu rəqəm daha da yüksəkdir.
1. TISA – 54 min manata qədər
Siyahının zirvəsində Azərbaycan Beynəlxalq Məktəbi – TISA dayanır.
Açıq mənbələrdə yayımlanan məlumatlara əsasən, məktəbdə təhsil haqqının manat ekvivalenti 54 900 manata qədər göstərilib.
Məktəbin özünün 2026/2027-ci tədris ili üzrə rəsmi tarifində isə 6-12-ci siniflər üçün illik təhsil haqqı 26 600 ABŞ dolları müəyyən edilib. Yeni şagirdlər üçün ilk ildə əlavə 6 000 dollar Development Fee də tutulur.
Yəni yalnız bu iki ödəniş birlikdə 32 600 dollar təşkil edə bilər.
2. Bakı Modern Təhsil Kompleksi – 25 000 manat
Bahalı özəl məktəblər siyahısında növbəti pillədə Bakı Modern Təhsil Kompleksi qərarlaşıb.
Burada illik təhsil haqqı sinifdən asılı olaraq dəyişir və 12 min manatdan başlayaraq 25 min manatadək yüksəlir.
Beləliklə, məktəbdə yuxarı qiymət həddinə görə təhsil alan bir şagird üçün illik xərc 25 min manata çata bilər.
3. Oxbridge Academy Baku – 24 820 manat
Beynəlxalq təhsil proqramları ilə seçilən Oxbridge Academy Baku da ən bahalı məktəblər sırasında yer alır.
Məktəbdə illik təhsil haqqı 15 640 manatdan 24 820 manatadək dəyişir. Ən yüksək məbləğ yuxarı siniflər üzrə müəyyənləşdirilib.
4. Azərbaycan Britaniya Kolleci – 22 000 manat
Azərbaycan Britaniya Kollecində illik təhsil haqqı 20-22 min manat aralığındadır.
Beləliklə, burada da bir şagirdin məktəb təhsilinə görə illik ödənişi 22 min manata qədər yüksələ bilir.
5. Bakı Oxford Məktəbi – 20 500 manat
Adından da göründüyü kimi, beynəlxalq təhsil modelinə yönələn Bakı Oxford Məktəbində illik ödənişlər sinifdən asılı olaraq dəyişir.
Açıq məlumatlara görə, təhsil haqqı 17 000-20 500 manat arasında dəyişir.
6. Müasir Təhsil Kompleksi – 19 000 manat
Müasir Təhsil Kompleksində də qiymətlər məktəbin pilləsinə görə dəyişir.
Burada illik təhsil haqqı 14 800 manatdan başlayaraq 19 min manatadək yüksəlir.
7. Dünya Məktəbi – 17 500 manat
Azərbaycanın tanınmış özəl təhsil müəssisələrindən biri olan Dünya Məktəbində illik təhsil haqqı ibtidai siniflərdə 11-13,5 min manat, orta siniflərdə isə 11,5-17,5 min manat təşkil edir.
Bu göstərici məktəbi ölkənin ən bahalı özəl təhsil müəssisələri sırasında saxlayır.
8. Avropa Azərbaycan Məktəbi – 16 150 manat
Avropa Azərbaycan Məktəbində qiymətlər təhsil pilləsindən asılı olaraq dəyişir.
İbtidai siniflər üçün illik təhsil haqqı 11 250 manat, orta siniflər üçün 13 250 manat, tam orta təhsil üzrə isə 16 150 manatdır.
9. SABIS SUN International School – 15 900 manat
Beynəlxalq proqramla fəaliyyət göstərən SABIS SUN International School-da illik təhsil haqqı 14 400-15 900 manat arasında dəyişir.
Məktəbin ən yüksək illik tarifi 15 900 manatdır.
10. XXI Əsr Beynəlxalq Təhsil və İnnovasiya Mərkəzi – 14 500 manat
Siyahının onuncu pilləsində XXI Əsr Beynəlxalq Təhsil və İnnovasiya Mərkəzi qərarlaşıb.
Məktəbdə orta siniflər üzrə illik təhsil haqqı 12 000-14 500 manat aralığındadır.
Bir uşağın məktəb xərci bununla bitmir
Araşdırmada diqqət çəkən əsas məqamlardan biri də odur ki, göstərilən rəqəmlər bir çox halda yalnız illik təhsil haqqını əhatə edir.
Valideynlər əlavə olaraq məktəbli forması, yemək, nəqliyyat, dərsdənkənar məşğələlər, bəzi beynəlxalq imtahanlar və digər xidmətlərə görə ayrıca ödəniş etməli ola bilərlər.
Məsələn, TISA-nın rəsmi məlumatında bəzi əlavə xidmət və fəaliyyətlərin ayrıca ödənişlə həyata keçirildiyi də görünür. Məktəbin musiqi akademiyasında fərdi dərsin qiyməti 30 manat, qeydiyyat isə hər şagird üçün hər trimestrə 60 manatdır.
Dövlət məktəbi ilə fərq nə qədərdir?
Beləliklə, yeni tədris ili ərəfəsində Azərbaycanda təhsil bazarının iki fərqli mənzərəsi ortaya çıxır: dövlət məktəblərində təhsil haqqı tələb olunmadığı halda, özəl məktəblərdə bir şagird üçün illik ödəniş minlərlə, bəzi hallarda isə on minlərlə manat təşkil edir.
Ən yüksək qiymətlər isə beynəlxalq proqramlar, xarici dil mühiti, beynəlxalq akkreditasiya və əlavə təhsil imkanları təklif edən məktəblərdə formalaşır.
Qeyd: Reytinq məktəblərin açıq mənbələrdə yayımlanan maksimum illik təhsil haqları əsasında hazırlanıb. Məbləğlər sinifə, təhsil proqramına və əlavə xidmətlərə görə dəyişə bilər. TISA üzrə isə məktəbin 2026/2027-ci tədris ili üçün rəsmi dollar tarifləri ayrıca nəzərə alınıb.
Əli Hüseynov
