Bakı 
Qazlı suyun nəmləndirmə baxımından qazsız sudan heç bir fərqi yoxdur. Tərkibindəki karbon qazı orqanizmin suyu mənimsəməsinə mane olmur.
Bakıvaxtı.az xarici mediaya istinadən xəbər verir ki, qazlı suyun qabarcıqları mədəni müvəqqəti doldurduğu üçün insanın daha az su içməsinə səbəb ola bilər.
Lakin eyni miqdarda su qəbul edildikdə, orqanizmin nəmlənmə səviyyəsi qazlı və qazsız suda eynidir.
Qazlı su bir qədər turş olduğundan nəzəri olaraq diş minasına təsir göstərə bilər. Buna baxmayaraq, onun dişlərə zərəri şəkərli qazlı içkilər və meyvə şirələri ilə müqayisədə daha azdır. Bu səbəbdən kola və ya portağal şirəsi əvəzinə qazlı su seçmək diş sağlamlığı baxımından daha faydalı seçim hesab olunur.
Bəzi kiçik araşdırmalar qazlı suyun həzm problemləri və qəbizliyin azalmasına kömək edə biləcəyini göstərib. Lakin bu nəticələr məhdud sayda iştirakçı və qısa müddətli tədqiqatlara əsaslanır.
2026-cı ildə aparılan başqa bir araşdırmada qazlı suyun ayıqlıq və diqqətə müəyyən təsir göstərə biləcəyi müəyyənləşdirilib. Ancaq tədqiqat cəmi 14 gəncin iştirakı ilə aparılıb və iştirakçılar hansı suyu içdiklərini bildikləri üçün plasebo effektini istisna etmək mümkün deyil. Araşdırmanın qismən alkoqolsuz içki şirkəti tərəfindən maliyyələşdirilməsi də nəticələrin qiymətləndirilməsində nəzərə alınmalı məqamdır.
Nəticə etibarilə, həm qazlı, həm də qazsız su sağlam və faydalı içkilərdir. Onların arasındakı fərqlər su ilə spirtli içkilər və ya şəkərli qazlı içkilər arasındakı fərqlə müqayisədə olduqca cüzidir. Bu səbəbdən qazlı və qazsız su arasındakı xırda fərqlərdən daha çox, ümumilikdə kifayət qədər su qəbul etməyə diqqət yetirmək daha önəmlidir.
Murad İsmayıl
