Bakı 
Kabarda-Balkarın Bezengi dərəsindəki Mijirgi dağında baş vermiş qar uçqunu ərazisində aparılan axtarış-xilasetmə tədbirləri zamanı daha bir alpinistin cəsədi aşkarlanıb və bununla da həlak olanların sayı 13 nəfərə çatıb.
Bakıvaxtı.az-ın məlumatına görə, bu barədə Rusiya Fövqəladə Hallar Nazirliyinin regional Baş İdarəsinin mətbuat xidməti xəbər yayıb.
Xəbərdə bildirilib ki, mütəxəssislər bir alpinistin meyitini tapıblar. Hazırda dörd nəfərin taleyi barədə heç bir məlumat yoxdur. Təhlükəli relyef və qar-buz kütləsinin yenidən çökmə riski axtarış işlərini çətinləşdirir.
Sentyabrın 9-da səhər saatlarında Bezengi dərəsində xilasetmə əməliyyatları bərpa edilib. İtkin düşən alpinistlərin axtarışına ümumilikdə 41 xilasedicidən ibarət qrup cəlb olunub.
Xatırladaq ki, sentyabrın 6-da axşam saatlarında Kabarda-Balkardakı Mijirgi dağından gələn uçqun marşrut üzrə hərəkət edən 33 nəfərlik alpinist qrupunun üzərinə düşüb. Bundan əvvəl 12 nəfərin öldüyü, 5 nəfərin isə itkin düşdüyü bildirilirdi.
Baş vermiş hadisə ilə bağlı Rusiya İstintaq Komitəsinin müvafiq orqanları tərəfindən səhlənkarlıq faktı üzrə cinayət işi açılıb və araşdırmalar davam etdirilir.
