Bakı 
Bu gün Milli Məclisin sədri Sahibə Qafarova İstanbulda keçirilən Parlamentlərarası İttifaqın (PAİ) 152-ci Assambleyası çərçivəsində Rusiya Federasiyası Federal Məclisi Federasiya Şurasının sədri Valentina Matviyenko ilə görüşüb.
Bu barədə Bakıvaxtı.az-a Milli Məclisin Mətbuat və ictimaiyyətlə əlaqələr şöbəsindən xəbər verilib.
Spiker Sahibə Qafarova PAİ və Qoşulmama Hərəkatının Parlament Şəbəkəsi (QHPŞ) kimi beynəlxalq platformaların əhəmiyyətini vurğulayıb.
Milli Məclisin sədri iki ölkə arasında əlaqələrin daha da inkişaf etdirilməsi üçün geniş potensialın mövcud olduğunu diqqətə çatdırıb, parlamentlərarası əlaqələrin rolundan danışıb. O, bildirib ki, bu gün qanunverici orqanlarımız arasında çox səmərəli əməkdaşlıq qurulub və parlamentarilərimiz həm ikitərəfli tədbirlərdə fəal iştirak edirlər, həm də beynəlxalq təşkilatlar çərçivəsində müsbət qarşılıqlı fəaliyyət göstərirlər.
Dünən Rusiya və Azərbaycan xarici işlər nazirliklərinin Azərbaycan təyyarəsinin 2024-cü il dekabrın 25-də Aktau yaxınlığında qəzaya uğraması barədə birgə bəyanatına toxunan Valentina Matviyenko baş vermiş bədbəxt hadisənin nəticələrinin tənzimlənməsinin əhəmiyyətini qeyd edib və bir daha başsağlığını çatdırıb. Federal Şuranın sədri İrandakı müharibə fonunda Rusiya vətəndaşlarının İrandan təhlükəsiz şəkildə çıxarılması üçün Azərbaycanın göstərdiyi yardıma görə təşəkkürünü bildirib.
Prezident İlham Əliyevlə və Birinci vitse-prezident Mehriban xanım Əliyeva ilə keçirdiyi görüşləri məmnunluqla xatırlayan Rusiya Federal Məclisi Federasiya Şurasının sədri Valentina Matviyenko bu görüşlər barədə təəssüratlarını bölüşüb.
Söhbət zamanı Milli Məclisin sədri Sahibə Qafarova iki ölkənin xarici işlər nazirliklərinin sonuncu bəyanatının əhəmiyyətini vurğulayıb.
Görüşdə xalqlarımız arasında mədəni, humanitar əlaqələrə də toxunulub, qarşılıqlı əlaqələrin daha da inkişaf etdirilməsinin vacibliyindən danışılıb.
Söhbətdə qarşılıqlı maraq doğuran digər mövzularda da fikir mübadiləsi aparılıb.
***
12:55
Rusiya Azərbaycanla münasibətlərin inkişafına hədəflənib.
Bakıvaxtı.az Rusiya Federasiya Şurasına istinadən xəbər verir ki, bu barədə Şuranın sədri Valentina Matviyenko İstanbulda Parlamentlərarası İttifaqın 152-ci Assambleyası çərçivəsində Milli Məclisin sədri Sahibə Qafarova ilə görüşdə bildirib.
Matviyenkonun sözlərinə görə, Bakı və Moskva arasındakı münasibətlər inkişaf üçün böyük potensiala malikdir.
O, həmçinin 2024-cü ildə AZAL aviaşirkətinə məxsus təyyarənin qəzaya uğramasının nəticələrinin tənzimlənməsi prosedurunun ötən gün başa çatdırılmasının əhəmiyyətini vurğulayıb və Azərbaycan tərəfinə başsağlığı verib.
Danışıqlar zamanı tərəflər Rusiya və Azərbaycan parlamentarilərinin əlaqələrinin müntəzəmliyini vurğulayıblar. Ötən ilin sonunda Moskvada Federal Məclisi Federasiya Şurası və Milli Məclisin Əməkdaşlıq üzrə Parlamentlərarası Komissiyasının iclası keçirilib, növbəti isə Bakıda keçiriləcək.
"On üçüncü Rusiya-Azərbaycan Regionlararası Forumunun keçirilmə müddəti və yeri ilə bağlı Azərbaycan tərəfinin təkliflərini gözləyirik. Hazırda Rusiya Federasiyasının yetmişdən çox subyekti Azərbaycanla əlaqələr saxlayır", - Valentina Matviyenko deyib.
