Bakı 
Ankara Böyükşəhər Bələdiyyəsinin sədri Mansur Yavaş Cümhuriyyət Xalq Partiyasından (CHP) istefa verib.
Bakıvaxtı.az xəbər verir ki, M.Yavaş bu barədə sosial media hesablarında paylaşım edib.
“Siyasətdə qəzəblə verilməyən, kinlə izah edilməyən müəyyən qərarlar var” deyən Mansur qeyd edib ki, bunlar ətraflı nəzərdən keçirilir, vicdanla ölçülür, məsuliyyət daşınır və nəhayət, Türk milləti qarşısında açıq şəkildə ifadə edilir.
“Bu gün verdiyim qərar da belə qərarlardan biridir.
19 martda başlayan və mütləq etibarsızlıqla bağlı müzakirələr də daxil olmaqla bir çox hüquqi və siyasi müzakirələrlə davam edən proses, Türk siyasətini hamımızın kədərlə izlədiyi bir nöqtəyə gətirib çıxardı.
Bu proses boyunca nə düşündüyümü, nəyə etiraz etdiyimi və hansı yolu təklif etdiyimi açıq şəkildə ifadə etdim. Bu gün bunları ətraflı şəkildə təkrarlamayacağam. Dünən dediklərim bu gün də eyni nöqtədəyəm. Fikirlərimdə heç nə dəyişməyib”.
Bəzi məqamlara toxunan Yavaş bildirib ki, partiya üzvü olaraq başa düşdüyü şey, daşıdığı kimliyi qorumaq, etibar edən insanları məyus etməmək, təmsil etdiyi siyasi quruluşa millətin gözündə nüfuz gətirmək və üzərinə götürdüyü məsuliyyəti layiqincə yerinə yetirməkdir.
Mansur Yavaş vurğulayıb ki, bundan sonra Ankara Böyükşəhər Bələdiyyəsinin meri olaraq, ona səs verib-verməmələrindən və siyasi baxışlarından asılı olmayaraq, bütün Ankara xalqına eyni anlayışla xidmət etməyə davam edəcək.
“Çünki mənim üçün bələdiyyə başçısı vəzifəsi siyasi karyerada pilləkən deyil, millətin əmanətidir.
Vəzifələr müvəqqətidir.
Siyasi şərtlər dəyişə bilər.
Amma millətin sizə verdiyi etimada sədaqət dəyişməz olaraq qalır.
Bu günə qədər bu etimadı necə qorumuşamsa, bundan sonra da eyni şəkildə qorumağa davam edəcəyəm.
Bu gün verdiyim qərara görə tam məsuliyyət daşıyıram.
Həmin qərar, həmişə olduğu kimi, hörmətli millətimizə məxsusdur”.
Murad Məmmədli
