Bakı 
ABŞ və İran arasında illərdir davam edən gərginlik fonunda regional və qlobal diplomatiya meydanında yeni ümid işartıları yaranıb.
Bakıvaxtı.az xəbər verir ki, son günlər hər iki tərəfdən səslənən yumşaldıcı bəyanatlar, eləcə də vasitəçi ölkələrin fəallaşması iki düşmən ölkə arasında mümkün sülh sazişinin gündəmə gəldiyini göstərir.
Məlumata görə, bir sıra Avropa ölkələri və Yaxın Şərqdə nüfuzlu vasitəçilər Vaşinqtonla Tehran arasında dolayı danışıqların intensivləşdiyini bildiriblər. Danışıqlarda əsas mövzular nüvə proqramı, regionda təhlükəsizlik balansı, sanksiyaların mərhələli şəkildə yumşaldılması və humanitar məsələlərdir.
Diplomatik mənbələrin sözlərinə görə, hər iki tərəf hazırda “gərginliyin azaldılması paketi” üzərində işləyir. Paket çərçivəsində İranın nüvə fəaliyyətinə daha sərt nəzarət və qarşılığında ABŞ tərəfindən iqtisadi məhdudiyyətlərin qismən aradan qaldırılması müzakirə edilir. Eyni zamanda, Yaxın Şərqdə insidentlərin qarşısının alınması üçün birbaşa əlaqə mexanizmlərinin yaradılması da gündəmdədir.
Rəsmi təsdiq olmasa da, ABŞ və İranın hazırkı dialoqa pozitiv yanaşması uzun illərdir dondurulmuş münasibətlərdə “tarixi dönüş nöqtəsi” ola biləcək bir sülh sazişinin imzalanacağına dair nikbinlik yaradır. Hazırda prosesdə iştirak edən vasitəçi ölkələr yaxın həftələrdə ciddi irəliləyiş olacağına ümid edir.
Murad İsmayıl
