Bakı 
Ölkə ərazisində güclü yağışların başladığı 27 mart 2026-cı il tarixindən 9 aprel tarixinədək olan dövrdə Aqrar Sığorta Fonduna müxtəlif hadisələr üzrə ümumilikdə 601 sığorta müqaviləsini əhatə edən 93 müraciət daxil olub.
Bu barədə Bakıvaxtı.az-a Kənd Təsərrüfatı Nazirliyindən məlumat verilib.
Bildirilib ki, bu müraciətlər müxtəlif bitkilərin əkildiyi 6541 hektar əkin sahəsini əhatə edir.
Ən çox müraciət Quba-Xaçmaz regionundan daxil olub. Bu bölgədən daxil olan müraciətlər 5700 hektar sahəni əhatə edir. Xüsusilə Xaçmaz və Şabran rayonlarından çoxsaylı müraciətlər qeydə alınıb.
Dağlıq Şirvan regionu üzrə 381 hektar, Mərkəzi Aran regionu üzrə 213 hektar, Gəncə-Daşkəsən regionu üzrə 154 hektar, Qarabağ regionu üzrə 56 hektar, Şirvan-Salyan regionu üzrə 24 hektar, Abşeron-Xızı regionu üzrə isə 12 hektar sahədə baş verən hadisə üzrə müraciətlər daxil olub.
Müraciətlərin böyük hissəsi – 6256 hektar sahə üzrə – sel və subasma hadisələri ilə bağlı olub. Bundan başqa 223 hektar sahə üzrə müraciətlər üçüncü şəxslərin hərəkətləri, 53 hektar üzrə fırtına-qasırğa, 5 hektar üzrə vəhşi heyvan hücumları, 3,46 hektar üzrə isə dolu hadisələri ilə bağlı olub.
Daxil olan bütün müraciətlər qeydə alınaraq hadisələrin araşdırılması və ilkin qiymətləndirilmənin aparılması üçün ərazilərə müstəqil aqrar sığorta ekspertləri göndərilib.
Qurumdan həmçinin qeyd edilib ki, yağış və sel-subasma hallarının davam etməsi səbəbindən bəzi ərazilər üzrə təkrar müraciətlər də daxil olur. Müraciətlərdə bildirilir ki, ilkin zərər qiymətləndirilməsi aparılmış bəzi sahələrdə hadisələr yenidən baş verib və həmin ərazilərə təkrar ekspertlər göndərilir.
