Bakı 
Argentina rəhbərliyi Malvin (Folklend) adalarına dair suverenlik hüquqlarını yenidən bəyan edərək, Böyük Britaniya hökumətini ikitərəfli müzakirələrə başlamağa dəvət edir.
Bakıvaxtı.az xəbər verir ki, bu məlumatı Cənubi Amerika dövlətinin xarici işlər, beynəlxalq ticarət və ibadət naziri Pablo Kirno açıqlayıb.
"Argentina dövləti, suverenliklə bağlı münaqişənin sülh yolu ilə və yekun həllinə nail olmaq, həmçinin mövcud müstəmləkə statusunu bitirmək məqsədilə Birləşmiş Krallıqla ikitərəfli müzakirələri yenidən başlamağa hazır olduğunu təsdiqləyir. Eyni zamanda, beynəlxalq ictimaiyyətə Malvin, Cənubi Corciya və Cənubi Sendviç adaları, eləcə də onlara aid dəniz zonaları üzərində ölkəmizin hüquqlarını dəstəklədikləri üçün minnətdarlığımızı bildiririk", - deyə nazir özünün "X" hesabında qeyd edib.
Aprelin 24-də Böyük Britaniya baş nazirinin ofisindən verilən açıqlamada vurğulanıb ki, rəsmi London Folklend (Malvin) adalarının statusu barədə ABŞ ilə hər hansı bir müzakirə aparmaq fikrində deyil və bu ərazilərin Birləşmiş Krallığa məxsus olduğu bir daha bəyan edilib.
Bir müddət əvvəl mətbuatda Pentaqonun İrana qarşı ehtimal olunan müharibədə Vaşinqtona dəstək verməkdən imtina edən NATO tərəfdaşlarını cəzalandırmaq yollarını araşdırdığı barədə məlumatlar yayılmışdı. Həmin ssenarilərdən biri də ABŞ-nin Folklend adalarına dair mövqeyini dəyişdirməsi ehtimalıdır. Hazırda Birləşmiş Ştatlar bu bölgənin Böyük Britaniyanın nəzarətində olduğunu tanıyır. Britaniya hökumət rəhbərinin nümayəndəsi isə bildirmişdi ki, London İrana qarşı hərbi əməliyyatlara qoşulmaq üçün "təzyiqlərə boyun əyməyəcək".
Cənub-Qərbi Atlantikada yerləşən Folklend (Malvin) adaları artıq iki əsrdir ki, Argentina və Birləşmiş Krallıq arasında ərazi iddialarının mərkəzindədir. 1982-ci ilin aprel ayında iki dövlət arasında hərbi toqquşma yaşandı. İki ay yarım çəkən müharibədə Cənubi Amerika ölkəsi məğlubiyyətə uğradı və 649 hərbçisini itirdi. Böyük Britaniyanın itkisi isə 255 nəfər oldu. 2013-cü ilin mart ayında adalarda keçirilən referendumda əhalinin əksəriyyəti Birləşmiş Krallığın tərkibində qalmağı seçdi. Lakin Argentina bu səsvermənin nəticələrini qəbul etməyib.
