Bakı 
ABŞ Senatı Ağ Evin Şərq qanadının yenidən qurulması layihəsi çərçivəsində prezidentin təhlükəsizliyi üçün nəzərdə tutulan 1 milyard dollarlıq maliyyə paketini təsdiqləməyib.
Bakıvaxtı.az xəbər verir ki, bu barədə “The Wall Street Journal” məlumat yayıb.
Senatdakı demokratların lideri Chuck Schumer bildirib ki, respublikaçılar Donald Trampın planlaşdırdığı yeni ziyafət zalı ilə bağlı xərcləri dövlət büdcəsi hesabına qarşılamağa çalışsalar da, demokratlar buna mane olublar.
Məlumata görə, qanun layihəsi Senatın Hüquq məsələləri üzrə komitəsi tərəfindən hazırlanıb. Sənəddə ayrılması nəzərdə tutulan vəsaitin birbaşa tikintiyə deyil, əsasən təhlükəsizlik tədbirlərinə yönəldilməsi planlaşdırılırdı.
Layihəyə əsasən, 220 milyon dollar ziyafət zalında gülləkeçirməz şüşələrin, dron aşkarlama sistemlərinin və zəhərli maddələri müəyyən edən avadanlıqların quraşdırılmasına ayrılmalı idi. Bundan başqa, Ağ Evə gələnlər üçün yeni yoxlama məntəqəsinin tikintisi, Məxfi Xidmət əməkdaşlarının hazırlığı, hava məkanının mühafizəsi və bioloji təhlükələrə qarşı tədbirlər üçün də yüz milyonlarla dollar nəzərdə tutulurdu.
ABŞ Məxfi Xidmətinin rəhbəri Sean Curran qeyd edib ki, maliyyələşmə təsdiqlənərsə, təhlükəsizlik sistemi ciddi şəkildə gücləndiriləcəkdi.
Senatdakı respublikaçıların lideri John Thune isə qanun layihəsinin yenidən baxılması üçün geri qaytarıldığını açıqlayıb.
Donald Trump Ağ Evdə yeni ziyafət zalının tikilməsi ideyasını 2025-ci ilin fevralında gündəmə gətirmişdi. Layihənin əsasən şəxsi vəsait və özəl ianələr hesabına maliyyələşdirilməsi planlaşdırılır. Təxminən 300 milyon dollar dəyərində qiymətləndirilən layihə üzrə tikinti işlərinə 2025-ci ildə başlanılıb.
Bu ilin martında Tarixi İrsin Qorunması Milli Fondunun iddiası əsasında məhkəmə tikintinin dayandırılması barədə qərar versə də, işlər 2026-cı ilin aprelində yenidən bərpa olunub.
