Bakı 
Ukraynaya dəstəyin davam etdirilməsi ona döyüş meydanında mövcud müsbət dinamikanı qoruyub saxlamağa kömək etməlidir. Hazırda müharibənin təşəbbüskarı Vladimir Putin çıxılmaz vəziyyətə düşüb.
Bakıvaxtı.az xəbər verir ki, bunu Almaniyanın müdafiə naziri Boris Pistorius bildirib.
“Putin çıxılmaz vəziyyətə düşüb. Onun Ukraynaya qarşı qanunsuz işğalı qoşunları arasında böyük itkilərə səbəb olmaqda davam edir. Kreml artıq bu müharibənin mənfi nəticələrini gizlədə bilmir. Onun təsirlərini Rusiya əhalisi getdikcə daha çox hiss edir”, – deyə Pistorius vurğulayıb.
Almaniyalı nazir qeyd edib ki, Ukrayna Prezidenti Vladimir Zelenski danışıqlar prosesini yenidən düzgün məcraya qaytarmaq üçün Rusiya lideri Vladimir Putinə birbaşa danışıqlar təklif edib:
“Lakin Kreml danışıqlara deyil, daha da gərginliyin artırılmasına üstünlük verir. Bu eskalasiya əsasən Ukraynaya qarşı yönəlib, eyni zamanda NATO-nun şərq cinahındakı tərəfdaşlarımıza da təsir edir. Bu, Putinin döyüş meydanındakı uğursuzluqlarından diqqəti yayındırmaq üçün ümidsiz cəhdidir. Biz buna görə kursumuzdan yayınmamalıyıq”.
