Bakı 
2035-ci ilə qədər Çinin paytaxtı Pekində əhalinin təxminən üçdəbiri 60 və daha yuxarı yaşda insanlar olacaq.
Bakıvaxtı.az xəbər verir ki, bu barədə rəsmi “Beijing Daily” qəzeti məlumat yayıb.
“Reuters” agentliyi yazır ki, Çin siyasətçiləri əhalinin planlaşdırılmasını ölkənin iqtisadi strategiyasının əsas hissəsinə çeviriblər və bu il hökumət doğum səviyyəsini stimullaşdırmaq üçün təxminən 180 milyard yuan (26,92 milyard dollar) potensial xərclərlə üzləşir.
Qəzetin məlumatına görə, ötən ilin sonunda Pekində 60 və daha yuxarı yaşda 5,29 milyon daimi sakin var idi ki, bu da şəhər əhalisinin təxminən dörddəbirini təşkil edirdi. Məqalədə qeyd olunur ki, şəhər hakimiyyəti yaşlı sakinlərin pensiyalarının artırılması da daxil olmaqla onlara dəstəyi gücləndirir. Çinin əhalisi 2022-ci ildən bəri azalır və ölkə sürətlə “qocalır” ki, bu da hökumətin daxili istehlakı stimullaşdırmaq və borcları azaltmaq planlarını çətinləşdirir. Çünki yüz milyonlarla insan əmək qüvvəsini tərk etməli olur və pensiya fondları izafi gərginlik altındadır.
Demoqraflar və iqtisadçılar iddia edirlər ki, bu gün uşaqların sayının azalması daha az ev təsərrüfatları və uzunmüddətli perspektivdə istehlak artımının yavaşlaması demək ola bilər.
