Bakı 
Bu həftə Avropa qeyri-adi istilik dalğası ilə üzləşib: bir çox ölkələrdə temperatur rekordları yüksək təzyiq zonasının ("istilik qübbəsi”) təsiri altında yenilənib.
Bakıvaxtı.az xəbər verir ki, bu barədə "The Guardian" yazır.
Çərşənbə axşamı Böyük Britaniyada may ayı üçün maksimum temperatur rekordu qeydə alınıb: London Kyu Kral Botanika Bağında 35,1°C ölçülüb. Bu göstərici bir gün əvvəl qeydə alınan 34,8°C rekordunu da keçib. Bundan əvvəl may ayı üzrə rekord 1922-ci ildə 32,8°C olmuş, 1944-cü ildə isə təkrarlanmışdı.
İrlandiyada da may ayı üçün temperatur rekordu yenilənib: Killarni (cənub-qərb) və Klonmel (cənub) meteoroloji stansiyalarında 28,8°C qeydə alınıb.
Təkcə gündüz temperaturları deyil, gecə minimumları da rekord səviyyəyə çatıb. Çərşənbə axşamı gecəsi İngiltərənin cənub-qərbindəki Kemborn şəhərində temperatur 21,4°C-dən aşağı düşməyib və bu, "tropik gecə” kimi qiymətləndirilib.
Fransada isə bazar ertəsi və çərşənbə axşamı temperatur 36°C-yə qədər yüksəlib və bu, ölkə tarixində ən isti may günləri olub. Fransa hökumət nümayəndəsinin sözlərinə görə, bu istilər nəticəsində birbaşa və ya dolayı yolla 7 nəfər həyatını itirib.
Qeyd olunur ki, Avropanın bəzi bölgələrində temperatur mövsüm norması ilə müqayisədə 10–15°C daha yüksəkdir. Həftənin qalan günlərində istilik 5–10°C yüksək qalacaq, lakin gələn həftə Böyük Britaniyada tədricən azalma gözlənilir.
