İran Körfəzdəki Amerika sənaye və hərbi obyektlərini hədəf alıb

İran dövlət televiziyası Tehranın Körfəzdəki Amerika sənaye və hərbi obyektlərini, eləcə də İsrail obyektlərini hədəf alan bir sıra hücumlar təşkil etdiyini iddia edib.

Bakıvaxtı.az xəbər verir ki, digər məlumata görə, İranda da yeni partlayışlar baş verib.

Belə ki, Tehran yaxınlığındakı körpüyə iki dəfə zərbə endirilib və ölkənin iki əsas polad zavodu hücumlar səbəbindən fəaliyyətini dayandırdıqlarını açıqlayıb.

Dövlət televiziyası Mərkəzi Hərbi Komandanlığın sözçüsü İbrahim Zülfəqariyə istinadən bildirib ki, İranın polad sənayesinə edilən hücumlara cavab olaraq SEPAH yeni hücum dalğasına başlayıb. Belə ki, Əbu-Dabidə yerləşən Amerika polad sənayesi, Bəhreyndə yerləşən Amerika alüminium sənayesi və  İsrailin “Rafael” silah fabrikləri hədəflər arasında olub.

Bundan əlavə, “Tasnim” agentliyi SEPAH-ın Dəniz Qüvvələrinin komandanlığına istinadən iddia edib ki, Dubaydakı “Oracle” və Bəhreyndə “Amazon” kimi Amerika şirkətlərinin məlumat mərkəzləri də hədəfə alınıb.

Dövlət televiziyasının məlumatına görə, İran qüvvələri həmçinin İsraildəki hava bazalarını, o cümlədən Tel Nof və Palmahimdəki bazaları, eləcə də bir neçə Körfəz ölkəsindəki hərbi qüvvələrin toplanma mərkəzlərini və ABŞ hərbi bazalarını hədəfə alıb.

Aydın Baxış