Bakı 
İngiltərə Futbol Assosiasiyası Londonun “Çelsi” klubunun ukraynalı futbolçusu Mixail Mudrikin dopinq işinin Ümumdünya Anti-Dopinq Agentliyinin (WADA) razılığı ilə həll olunduğunu bildirib.
Bakıvaxtı.az xəbər verir ki, bu barədə qurumun rəsmi bəyanatında məlumat verilib.
Məlumata görə, 2024-cü ilin 17 dekabr tarixində ukraynalı futbolçunun dopinq-testdən keçə bilmədiyi və onun qanında meldoni maddəsinin aşkarlandığı məlum olmuşdu. Avropada böyük səs-küyə səbəb olan hadisədən sonra İngiltərə Futbol Assosiasiyası Mudrikin “B” sınaq nümunəsi mənfi çıxsa belə, onun cəzalandırıla biləcəyi barədə xəbərdarlıq etmişdi.
Araşdırmalar çərçivəsində 2025-ci ilin aprelində futbolçu yalan detektorundan (poliqraf) keçirilmiş, iyulun 19-da isə onun ikinci dopinq-sınağının da müsbət nəticə verdiyi təsdiqlənmişdi. Cari ilin yanvar ayının 14-dən etibarən isə İFA rəsmi intizam araşdırmasına başlamışdı.
Qeyd edək ki, meldoni maddəsi WADA tərəfindən 2016-cı ildən etibarən qadağan olunmuş vasitələr siyahısına daxil edilib. Mixail Mudrik 2023-cü ildə “Şaxtyor”dan “Çelsi”yə transfer olunub və London klubunun heyətində keçirdiyi 73 rəsmi oyunda 10 qolla yadda qalıb.
